Wenn du di jeden Dach satt ät´n kannst, denn kannst du locke öbe dann Hunge snack´n. Wenn du upp´n Barch dien Huus stah´n hest, interessiert die datt Hochwade ok nich un wenn du mit Rott´n, Müüs, Mord´n (Marder) un Föss keen Arge hest, sünd düsse Deert´n Läbewes´n, de läb´n schöllt un ok sik vemehr´n dörft. Süsse Ansicht´n hört wü as Jages un Fallenstellers sehr öft, un mööt uns in de Gesellschaft rechtfertigen, wenn dat Thema upkümmt. Wü as Jages sniet dat Thema up een Geburtstagsfie orre süss wo goarnich an, abe manchmal kummt dat ganz von alleen, orre irgendeen hett Probleme un sogoar Schaden dörch de Deert´n de ik baben upfeuert heff.
„Sagen Sie mal Herr Meyer, Sie sind doch Jäger, ich habe da ein Problem. Ich habe Tiere auf meinem Dachboden, die machen Lärm, Unruhe und Gestank und Schaden an der Dachisolierung. Was kann man da machen? Nachts kann ich oft nicht mehr schlafen.“ „Ssüh, so, Herr Meyer, war nu?“ Mit Mord´nhett Herr Meyer goarnix tou doun. He kennt woll Hirsche, Reh un Wildswien abe Mord´n? Nu is de Jäge Meyer abe in Not.
He kennt ji de Lehrerin mit datt Problem. Seei hett mehrere Katt´n, twee Hun´n un is ok in Tierschutzvereen. Betahlt fliedich ehr´n Bidrach bien NABU un nusowatt. Herr Meyer is doch Jäge, he mutt doch een Lösung hebb´n un blemiern will he sik ok nich. He weet genau bi de Frou is scheet´n, fang´n un dood maak´n nich tou empfähl´n. Am leefsten möch seei datt Deert schonend, läbend fangen un annesiet de Elv wädde utsett´n. Datt Problem also verlagern. Herr Meyer is swoar in Erklärungsnot. He weet sik abe tou help´n He het keen Fallnschien un vewiest de Frou up een Fründ, de datt Problem lost, nah Recht un Gesetz, fachlich un ahn Toukiekes. Meist wöllt de Lüüd datt allns goarnivh so genau weet´n. Dar Problem is löst un basta.
Ssüh, si is de Minsch. He maakt´t groode Wöör, abe is he sülms bedraap´n, dreiht he sik um 180°. So ok mien Nawe ut Berlin. Een Natur- un Tierschütze dörch en dörch. Datt ich as Jäge Föss und Mord´n scheet´n un fang´n däh, paß em goarnich un manche Diskussion harrn wü schon achte uns. Nu schafft he sik Heuhne un Aant´n an. He wör een klook´n Minsch´n, wi väle Berliner. De Heuhne un Aant´m keum an Daach ruut un abends wädde in Stall. De Foss könn ji de Deert´n nix doan. Wü Jäges weet aber genau, dat de Foss, wenn he Lüdde in Bou hett, ok am Daach losgeiht un Fudde ranhalt. Un watt bütt sik bäde an, as bi dan Berliner in Goarn an Daach ok mal een Fanh tou riskieren. 5 Heuhne un 2 Aant´n dann ersten Daach un dann Rest 3 Daach lööta. Siene Meinung von dann Berliner öbe
Raubwildjagd hett sich seit dann Daach gewaltig ännert.
Ssüh, so is de Minsch, annere grifft datt nich.
Hans-Heinrich Dützmann
